由細細個開始，每個人都有大大細細、唔同形狀嘅隱形貼紙，寫咗唔同嘅嘢响上面，用唔同嘅方式貼响身上面。可以係其他人貼，亦都可以係自己貼，建立今日嘅我。
我決定聽醫生嘅建議入住精神科病房，醫生面無表情咁問我咩事入黎，我腦海一片空白，無講任何嘢。「睇黎你患上抑鬱症，你食下藥先再觀察一下！」醫生好冷淡咁回應，收返我嘅檔案，然後示意我離開。
「抑鬱症？！單單食藥真係處理到我嘅困擾咩？」心裡覺得好疑惑、好迷惘，响醫院入面拎起紙筆不停畫畫抒發我嘅情緒。
出左醫院後，情緒仍然好唔穩定。朋友知道我嘅情況，就同我講：「我好擔心你，我識得一位輔導佢好好架，不如你試下見一見佢，睇下佢幫唔幫到你呀?」睇見朋友好著緊擔心我嘅情況，我決定嘗試見下。
响心情緊張之下行入輔導室門口，輔導員坐低後，畀咗幾份評估表格我填，不停填，填唔停……期間又會同我下傾計。花咗好時間終於填完啦！交評估表畀佢時，佢好努力咁計分數。
「醫生話你有抑鬱症？我諗你唔止抑鬱症，仲有焦慮症、驚恐症、迴避性人格障礙、不被愛妄想症、自我質疑症！」輔導一口氣講咗好多病名，當輔導講咗咁多病名，我好驚，有啲名係聽都未聽過。心裡面打咗個冷震，講唔到野。我開始懷疑係咪得自己先係咁怪！係咪即係無得救？一張張隱形貼紙寫上大大隻字嘅病名，用咗強大黐力貼响我身上面，定咗我嘅人格。
輔導員好有自信咁講落去：「睇到你依家好驚，但唔使驚，我都有你好多相似經歷，你只要相信我，跟足我指示做嘅話就會好返。」
我好猶豫咁講：「咩人有資格定一個人的病？醫生？臨床心理學家？輔導？社工？填一份又一份評估表就定型咗我係咩人？咁樣對我有咩好處？醫生同你話跟你地方法就會好返？每個人都唔同，情況都唔同。受到困擾的係我，點解一定跟你嘅方法先會好返？而我唔能夠响當中比意見，共同決定治療旅程？」
標籤不代表我的全部，我怪，也很美。
By Chocolate